फिल्म निर्माता वाग्लेसमेत ६ जना साढे दुई करोड नक्कली नोटसहित पक्राउ (भिडियो)
काठमाडौं, जेठ २ । महानगरीय प्रहरी परिसर काठमाडौंले साढे दुई करोडभन्दा बढी नक्कली नेपाली नोटसहित ६ जनालाई पक्राउ गरेको छ ।
पक्राउ पर्नेहरुमा चलचित्र निर्माता माधव वाग्ले, महेन्द्र बोगटी, सुजित तामाङ, साजन तामाङ, प्रकाश सुवेदी र विवेक नापित रहेका छन् ।
प्रहरीले बुधबार पत्रकार सम्मेलन गरी उनीहरुसहित उनीहरुबाट बरामद गरिएको नक्कली नोट सार्वजनिक गरेको छ ।
उनीहरुले विभिन्न स्थानमा राखेको दुई करोड ६० लाख ६३ हजार रुपैयाँ नक्कली नोट बरामद भएको महानगरीय प्रहरी परिसर काठमाडौंका प्रमुख एसएसपी विश्वराज पोखरेलले जानकारी दिए ।
गोंगबु, लुभु र बागबजारबाट यी नोट बरामद गरिएको पनि प्रहरीले जनाएको छ ।
भक्तपुरको नवज्योति प्रिन्टिङ प्रेसका सन्चालक प्रकाश सुवेदीले बागबजारको जय भोलेबाबा प्रिन्टिङ प्रेसका सन्चालक विवेक नापितलाई नोट छाप्न दिएको र जय भोलेबाबा प्रेसमा नोट छापिएको थाहा भएको पनि प्रहरीले जनाएको छ ।
नोट बनाउन प्रयोग गरिएका चारओटा ‘प्लेट’ पनि फेलापरेको प्रहरीले जनाएको छ ।
यस्ता नक्कली नोटहरु होटल रेस्टुराँमा बिल तिर्ने, यौनकर्मीलाई दिने, जुवातास खेल्ने, लागुऔषध कारोबारमा लगाउने र सक्कलीमा मिसाएर बजारमा पुर्याउने गरिएको पनि प्रहरीको भनाइ छ ।
चलचित्र निर्माता वाग्लेले भने फिल्म सुटिङका लागि नक्कली नोट बनाएको दावी गरेका छन् । वाग्ले चलचित्र ‘लुट’, ‘छड्के’, ‘रेशम फिलिली’लगायतका निर्माता हुन् ।
भिडियो हेर्नुहोस्
नेपाली म्युजिक भिडियो हेर्न तलको लिन्क खोल्नुहोस्।
Comments
Post a Comment